Oddiy kanakunjut, lipidlar bilan boyitilgan dorivor o‘simlik bo‘lib, bo‘yi 2 m ga yetadi. Poyasi shoxlangan bargi yirik, tuksiz, 5—11 barmoqsimon bo‘lakli bo‘lib, uzun bandi bilan poyada ketma-ket joylashgan. Mevasi uch urug‘li, uch chanoqli, tikan bilan qoplangan ko‘sak. Gullari shingilga to‘plangan. Guli ko‘rimsiz, bir jinsli, gulqo‘rg‘oni oddiy, onalik gullari shingilning yuqori qismiga, otalik gullari esa pastki qismiga joylashgan. Mevasi iyul-oktabrda yetiladi.