Ернинг литосфера қобиғи ҳар хил тоғ жинсларидан иборат. Тоғ жинслари деб Ер пўстида содир бўладиган геологик жараёнлар натижасида ҳосил бўлган бир неча минераллар бирикмасидан иборат табиий бирикмаларга айтилади. Тоғ жинслар бир минералдан таркиб топган бўлса мономинералли (гипс, доломит ), бир неча минералдан таркиб топган бўлса полиминералли (граниткварц, дала шпати, слюда минералларидан ташкил топган) тоғ жинслари деб аталади. Тоғ жинслари бирламчи ва иккиламчи минераллардан ташкил топган бўлиши мумкин. Тоғ жинсларининг тузилишини уларнинг структураси ва текстураси белгилайди. Структура-жинсларни ташкил этувчи минерал заррачалар ва агрегатларининг ички тузилиши, шакли ва ўлчами, миқдорий нисбати ва бу заррачаларнинг бир-бири билан ўзаро боғлиқлигига айтилади. Масалан: донадор, чала кристалланган, шишасимон; зарраларнинг ўлчамига кўра йирик, жуда йирик, майда ва бошқа структуралар. Текстура деб тоғ жинсларини ташкил этувчи минерал заррача ва агрегатларнинг жинсларда фазовий жойлашига ва жинсларнинг яхлитлик даражасига айтилади: зич, массив, қатқат, йўл-йўл, ғовакли ва ҳаказо текстуралар. Тоғ жинслари ҳосил бўлиш шароитига ва таркибига қараб учта асосий генетик гуруҳга бўлинади: магматик, чўкинди, ва метаморфик жинслар.