Elektrotexnika va elektronika asoslari fanining predmeti, vazifalari va manbalari. Elektr energiyasi to’g’risida umumiy ma’lumotlar. Elektr energiyasi, uning xususiyatlari va qo’llanish soxalari O’zbekiston Respublikasi elektrlashtirishning taraqqiyoti. Elektrotexnika fan sifatida elektr va magnit hodisalarini o’rganish va ularni amalda qo’llash bilan shug’ullanadi. Elektr energiyasi inson faoliyatining barcha sohalarida qo’llaniladi.Ishlab chiqarish qurilmalari, asosan, elektr dvigatellari bilan harakatlanadi; elektrik noelektrik parametrlar elektr asboblar va qurilmalar yordamida o’lchanadi va nazorat qilinadi. Ko’pincha zamonaviy avtomatik boshqaruv sistemalari elektrik va noelektrik elementlar asosida quriladi. Elektr energiya shaharlar va qishloqlarni obodanlashtirishda katta ro’l o’ynaydi. Inson hayotida elektr energiyasining ulkan ahamiyati uning yutuqlari bilan izohlanadi: elektr energiyani yirik elektrostansiyalarda ishlab chiqarish, uzoq masofalarga uzatish va turli iste’molchilar orasida taqsimlash mumkin. Bundan tashqari, elektr energiyani boshqa energiya turlariga osongina o’zgartirish mumkin. Elektronika fan sifatida elektr asboblarni o’rganish va ularni amalda qo’llash bilan shug’ullanadi. Ular vakuumda, gazda va qattiq kristall jismlarda zaryadlangan zarrachalar konsentratsiyasining o’zgarishiga asoslangan.