Davlat iqtisodiyotni bilvosita tartibga solib turish uchun asosan ikkita muhim dastakdan foydalanadi: pul-kredit siyosati (yoki monetar siyosat) va soliq-budjet siyosati (yoki fiskal siyosat). Fiskal siyosatni davlatning moliyaviy siyosati ham deb atashadi. Fiskal siyosat orqali davlat o‘z daromadlarini shakllantiradi va xarajatlarni amalga oshiradi. Davlat budjeti - davlat pul mablag‘larining (shu jumladan, davlat maqsadli jamg‘armalari mablag‘larining) markazlashtirilgan jamg‘armasi bo‘lib, unda daromadlar manbalari va ulardan tushumlar miqdori, shuningdek, moliya yili mobaynida aniq maqsadlar uchun ajratiladigan mablag‘lar sarfi yo‘nalishlari va miqdori nazarda tutiladi. Davlat budjeti ikki asosiy qismdan - daromadlar va harajatlardan iborat.