O'quv mashg'ulotlar dars jadvali asosida o'tkaziladi. Talabaning ishdan ajralgan holda ta'lim olishning chegaraviy yuklamasi, jadvalda inobatga olingan mashg'ulotlarni barcha turlari bo'yicha haftasiga 36 soatdan oshmasligi lozim. Oliy ta'lim muassasasida (OTM) ta'lim jarayoni maktab, akademik litsey va kasb-hunar kollejlaridan farq qiladi. Oliy o'quv yurtida talabalarning mustaqil ishlariga ko'proq vaqt ajratiladi va bu esa talablarning ijodiy fikrlashlarini rivojlantiradi. O'quv fanlari hajmining kamida 25 foizi mustaqil ta'lim tarzida o'zlashtirilishi shart. OTM da ma'ruza mashg'ulotlariga (nazariy mashg'ulotlar) alohida e'tibor qaratiladi va unga jami o'quv yuklamasining 40 foizigacha yuklama ajratiladi. Ma'ruza mashg'ulotlari har bir fanni o'qitishda tashkiliy va yo'naltiruvchi rol hisoblanadi. Ko'p yillik hayotiy tajriba va chuqur nazariy bilimlar ma'ruzachiga talabalarni o'qiyotgan fanlaridan to'liq va aniq tushunchalar olishga va , fanni sevib o'rganishga yordam beradi.