Kam qavatli uylar bir yoki ikki qavatli qilib quriladi. Ular hovlili, tomorqali yoki tomorqasiz bo‘lishi mumkin. O‘zbekiston sharoitida ular, odatda, tomorqali qilib quriladi. Tomorqali uylar, o‘z navbatida, uyning hovli ichida alohida yoki hovlining boshida, burchagida joylashgan ko‘rinishlarda, uylar va tomorqalarning birbiriga yon tomonlardan tutashtirilgan, ya’ni blokirovki qilib qurilgan ko‘rinishlarda bo‘ladi. Kam qavatli uylar, asosan, qishloqlarda, shahar mahallalarida, tuman markazlarida katta oilalar yoki ko‘p (ikki, uch) avloddan iborat oilalarga mo‘ljallangan bo‘ladi. Bir qavatli hovlili (tomorqali) uylar, asosan, qishloq joylarda ko‘p quriladi. Biroq ular hozirgi paytda tuman markazlari va shahar chetlarida ham qurilmoqda. Uyga kirish, asosan, ko‘cha tomondan tashkil etilgan bo‘lib, yo‘lak bilan umumiy xona va oshxonadan hovliga chiqishga qulay sharoit yaratilgan bo‘lishi kerak. Yozgi xona (ayvon), asosan, hovli tomonda joylashgan bo‘lib, umumiy xona va oshxona bilan bog‘langan bo‘lishi shart. Qishloq joylarda namunaviy loyihalar asosida qurilgan kam qavatli hovlili uylar.