Янги туғилган чақалоқда кўрик шароитларини мослашдан бошлаш керак, чунки хонанинг ҳарорати, ёритилиши етарли бўлмаса, ҳосил қилинадиган рефлекс, реакциялар ва бошқаларга таъсир этади. Кўрик вақтида хонада ҳавонинг оптимал ҳарорати боланинг 2-3 дақиқалик очиқ ҳолатдаги мослашишидан сўнг, тахминан 24-260С бўлиши керак. Паст ҳароратда мускуллар тонусининг ошиши ва тремор пайдо бўлиши, юқори ҳароратда – мускуллар гипотонияси бўлиши мумкин. Ёритилиш янги туғилган чақалоққа нисбатан симметрик бўлиши керак, чунки бир томондан тушаётган ёруғлик қорачиқ ва кўз ёриғининг ёритилган томонда торайишини ифодалайди. Кўздан кечиришда боланинг боши сагитал текисликда бўлиши зарур, чунки бош бурилган томондаги асимметрик бўйин-тоник рефлекс туфайли бош бурилган томонда мускул тонусининг пасайиши, қарама-қарши томонда эса ошиши қайд қилинади. Охирги эмизишдан кейин ўтган вақтни ҳисобга олиш зарур, чунки бола тўйганидан сўнг бўшашган, унда мускул тонуси ва қатор рефлекслар ҳамда реакциялар пасайган бўлиши мумкин, эмизишдан олдин эса янги туғилган чақалоқ безовталик, тремор ва мускул тонуси ошишига олиб келадиган нисбий гипогликемия ҳолатида бўлиши мумкин. Кейинроқ янги туғилган чақалоқнинг ҳолатини аниқлаш мақсадга мувофиқ бўлади, чунки рефлекслар ва реакцияларнинг бир хил кўрсаткичлари боланинг бир ҳолати учун физиологик ва бошқа ҳолати учун патологик бўлиши мумкин.