Hozirgi globallashuv va raqamlashtirish davrida axborot texnologiyalari jamiyat taraqqiyotining ajralmas qismiga aylanib bormoqda. Ayniqsa, web dasturlash sohasi kundalik hayotimizning barcha jabhalarida keng qo‘llanilmoqda. Bugungi kunda ta’lim tizimi, elektron savdo platformalari, bank va moliya xizmatlari, sog‘liqni saqlash tizimi hamda davlat xizmatlari web-ilovalar orqali amalga oshirilmoqda. Bu esa web-ilovalarga bo‘lgan talabni yanada oshirib, ularning sifatli, tezkor va ishonchli ishlashini muhim masalaga aylantirmoqda. Web-ilovalarning samaradorligi ko‘p jihatdan ma’lumotlar bazasi bilan ishlash tezligiga bog‘liq. Zamonaviy web tizimlarda millionlab foydalanuvchilar va ularga tegishli katta hajmdagi ma’lumotlar saqlanadi. Ushbu ma’lumotlarni qisqa vaqt ichida izlash, qayta ishlash va foydalanuvchiga yetkazib berish web dasturlash jarayonining asosiy vazifalaridan biri hisoblanadi. Agar ma’lumotlar bazasi samarali tashkil etilmagan bo‘lsa, web-ilova sekin ishlaydi, server yuklamasi ortadi va foydalanuvchi tajribasi yomonlashadi. Ma’lumotlar bazasida indekslash va optimallashtirish texnologiyalari aynan ushbu muammolarni hal etishga qaratilgan. Indekslar yordamida ma’lumotlarni izlash jarayoni tezlashtiriladi, jadval bo‘ylab to‘liq qidiruv o‘rniga maxsus tuzilmalar orqali kerakli yozuvlar topiladi.