Raqamli texnologiyalar hayotimizning barcha sohalariga chuqur kirib kelar ekan, axborot tizimlarining xavfsizligini ta’minlash va kompyuter jinoyatlarining oldini olish dolzarb masalalardan biriga aylanmoqda. Ayniqsa, so‘nggi yillarda elektron hujjatlar, tarmoqdagi tranzaksiyalar, masofaviy boshqaruv vositalari, raqamli identifikatsiya kabi imkoniyatlarning kengayishi bilan raqamli jinoyatlar soni va shakllari ortib bormoqda. Shu sababli, kompyuter sud-ekspertizasi sohasi bugungi kunda yuridik, texnik va axborot xavfsizligi choralarining kesishgan nuqtasiga aylanib bormoqda.         Kompyuter sud-ekspertizasi jarayonida tarmoqdan olinadigan raqamli dalillarning aniqligi, yaxlitligi va qonuniyligi muhim ahamiyat kasb etadi. Aynan shu jarayonda tarmoqlararo ekran vositalari (firewall), IDS/IPS tizimlari, paket darajasidagi tahlil vositalari (DPI) va boshqa xavfsizlik texnologiyalari asosiy rol o‘ynaydi. Ular orqali hujum izlarini aniqlash, trafikni vizual tahlil qilish, xavfsizlik hodisalarini rekonstruksiya qilish va sudga yaroqli dalillarni shakllantirish mumkin bo‘ladi.