Kirish O‘zbek etnografiyasi xalqimizning boy madaniy merosi, urf-odatlari, qadriyatlari va hayot falsafasini o‘zida aks ettiradi. Har bir xalqning tarixiy shakllangan dunyoqarashi, madaniyati va qadriyatlari mukammal inson tushunchasining o‘ziga xos modelini yaratishga xizmat qiladi. O‘zbek xalqi asrlar davomida yuksak axloqiy va ma’naviy sifatlarni qadrlab, mukammal insonni mehnatsevarlik, halollik, odob-axloq va bilimdonlik kabi xususiyatlar bilan tasvirlab kelgan. Mazkur mavzuda o‘zbek xalqining mukammal inson modeli etnografik nuqtayi nazardan o‘rganilib, bu tushunchaning shakllanishida milliy qadriyatlar, diniy e’tiqod va tarixiy an’analarning o‘rni tahlil qilinadi. Shuningdek, o‘zbek xalqining etnik ongida mukammal insonning qanday talqin qilingani, bu tushunchaning amaliy hayotdagi ifodasi va zamonaviy jamiyatdagi ahamiyati yoritiladi.