Ўқув жараёнида ўқитувчи раҳбарлик вазифасини бажаради. Бу умумий қоида касб таълими ўқитувчисига ҳам таалуқлидир. Касб таълимида вақтнинг қисмини ўқувчиларнинг мустақил амалий ишлари эгаллаши ўқитувчининг ролини янада оширади. Чунки ҳамма нарса ўқитувчи томонидан олдиндан пухта ўйланса ва яхши планлаштирилсагина ўқувчилар мустақил ишлай олишлари мумкин. Касб таълими ўқитувчиси дарсга тайёрланаётганда ҳар хил метод ва усулларни қўллаб янги материални қандай баён қилишни ўйлайди. У ўқувчиларнинг индивидуал хусусиятларини, уларнинг тажрибаси, жисмоний ривожланиши ва меҳнат унумдорлигига таъсир қиладиган бошқа омилларни ҳисобга олган ҳолда объектларни танлайди.