Ўрганилаётган ҳодиса бўйича статистик кузатиш ўтказиш натижасида у ҳақида кўпдан-кўп ва турли-туман тарқоқ маълумотлар тўпланади. Бу маълумотлар асосида ҳали ҳеч қандай фикр юритиб бўлмайди, чунки улар тарқоқ ва ҳар хилдир. Шунинг учун ҳам навбатдаги вазифа тўпланган маълумотларни бир тизимга келтириш, тартибга солиш, умумлаштиришдан иборатдир. Бу муаммо статистикада жамлаш (сводкалаш) методини қўллаш билан ҳал этилади. Жамлашдан статистик текширишнинг иккинчи босқичи бошланади.