Turkistonda diniy musulmon maktablari tizimi boshlang‘ich savod maktabi, daloyixona, qorixona va madrasadan iborat bo‘lib, boshlang‘ich savod maktablarida bolalarga taxtaga bitilgan 28ta arab harfi (“Alifbo”) ikki yil davomida yod oldirilgan. So‘ngra “hijo usuli”da (bo‘g‘inlab o‘qish) o‘qishga o‘rgatilgan. “Haftiyak”, “Qur’on”, “Chor kitob” hamda Navoiy, Hofiz, Bedil, Fuzuliy va So‘fi Olloyor kitoblari shu usulda o‘rgatilgan. Abduqodir Shakuriy 1901-yilda Samarqanddagi Rajab Amin qishlog‘ida yangi usuldagi maktabni ochdi va “usulu savtiya” bilan ish olib boradi. Shu metod asosida tojik tilida “Rahnamoyi savod”, “Ta’limi alifbo” kabi darsliklarni tuzadi.