Sayyoramiz ichki qismidagi dinamik protsesslar natijasida kuchli bosim va energiya paydo bo‘lib, yer po‘stida turli harakatlar (tektonik harakatlar) yuzaga keladi. Bu harakatlar jinslarning bukilishi, sinishi va yorilishi kabi jarayonlarga olib keladi. Natijada tog‘lar, tekisliklar va botiqlar shakllanadi. Yer yuzasida yiliga taxminan bir million zilzila yuz beradi, ulardan o‘n foizi kishilar tomonidan seziladi, qolgan qismi esa seysmograf yordamida qayd etiladi.