“Aqliy hujum” metodi ta’lim oluvchilarning erkin fikr va mulohazalarini yig‘ish orqali muammo yechimini topishga xizmat qiluvchi ta’lim usuli. Ushbu metodda yozma va og‘zaki shakllar mavjud bo‘lib, ta’lim oluvchilar o‘z fikrlarini qisqa va aniq bayon etadilar. Metod natijalarni baholamasligi tufayli turli g‘oyalar shakllanishiga, ta’lim oluvchilarning ijodiy fikrlash ko‘nikmasi va muloqot madaniyatiga yordam beradi. Metod ta’lim jarayonining turli bosqichlarida samarali qo‘llaniladi va barcha ishtirokchilarni faol jalb etishni ta’minlaydi.