Xayol, arabcha o‘ylash, tasavvur qilish – ma’naviy hodisa, tafakkur singari bilish jarayonlaridan biri. Insonning ruhiy faoliyatida, muayyan darajaga ega bo‘lgan muammoli vaziyat vujudga kelishida hamda uning hal qilinishida ishtirok etadi. Xayol hayotda inson tomonidan idrok etilmagan tasavvur hamda o‘ydagi holatlarning vujudga kelishidan tarkib topadi. Xayol muayyan hissiy timsollarga yoki borliqning aniq andozalariga tayanadi. Zamon va makon borasida chegara yo‘q. Voqelikdan oldinda yuradi va uni olg‘a yetaklaydi. Kashfiyotga olib keluvchi gumon, faraz va sezgi ham xayolsiz bo‘lmaydi. Xayol voqelikni mohiyatiga ko‘ra umumlashgan holda idrok etish hodisasidir. Amaliy faoliyat boshlanmasdan turib, uning mahsulini oldindan tasavvur qilish va ularni timsollar tariqasida vujudga keltirish xayolning asosiy vazifasi hisoblanadi.