Serpantinalarning asosiy elementlari. Tik qiyalik joylarda yo‘llarni trassalashda ko‘pincha o‘tkir ichki burchakli egri-bugri ko‘rinishdagi chiziq hosil qilishga to‘g‘ri keladi. Bunday hollarda yo‘lning to‘g‘ri qismlarini an’anaviy qayrilmalar yordamida tutashtirishga imkoniyat yo‘q. Bu qayrilmalarning boshi bilan oxiri orasidagi balandliklar farqining kattaligi va ular orasidagi masofaning kichikligi hisobiga, yo‘l qo‘yarlidan kattaroq bo‘lgan bo‘ylama nishablik hosil bo‘ladi. Shu sababli bunday uchastkalardagi chiziqlarni tutashtirish serpantina deb nomlangan, murakkab qayrilmalar yordamida amalga oshiriladi. Tog‘li joylardagi trassalarda serpantinalar jarlik, soylik, mustahkam bo‘lmagan joylar va boshqa to‘siqlarni aylanib o‘tishda loyihalanadi.