İnfeksiya-patogen mikroorqanizmin makroorqanizmə daxil olması və orada artıb çoxalması nəticəsində makroorqanizmdə baş verən mürəkkəb bioloji proseslər kompleksidir. İnfeksion prosesin baş verməsi və inkişafı makroorqanizmin öz tamlığının qorunması uğrunda apardığı mübarizə reaksiyasıdır. Patogen mikroorqanizm makroorqanizmin daxili mühit sabitliyinin pozulmasına səbəb olur və orqanizm öz tamlığını qorumaq üçün müxtəlif müdafiə amillərindən istifadə edir. Bu prosesə xarici mühit amilləri də böyük təsir göstərir. İnfeksion prosesdə makroorqanizm, onun mərkəzi sinir sistemi və müdafiə amilləri əsas rol oynayır.