Mikrobiologik amaliyotda bakteriya yoki boshqa mikroorganizmlarni laboratoriya va ishlab chiqarish sharoitida koʼpaytirish uchun qoʼllaniladigan, turli tarkibli murakkab yoki oddiy birikmalardan tashkil topgan ozuqa moddalarga oziqli muhit deb ataladi. Oziqli muhitlar kelib chiqishiga qarab, tabiiy va sunʼiy muhitga boʼlinadi. Tabiiy muhitlar hayvonlar mahsuloti (qon, zardob, oʼt-safro, mol goʼshti, tuxum va bosh.) va oʼsimliklardan (meva va sabzavotlar) olinadi. Sunʼiy muhitlar esa yuqoridagi moddalardan olingan mahsulotlardan (pepton, aminopeptid, achitqi uglevodlar va joʼxori ekstraktlari) tayyorlanadi.