Tasodifiy yurakdan o‘lim (TYO‘) – bu yurak kasalligi oldindan tashxislanmagan yoki hech qanday simptomlar bo‘lmagan holatda, yurakning to‘satdan funksional to‘xtashi natijasida yuz beradigan o‘lim turidir. Bu sindrom ko‘pincha klinik sog‘lom ko‘ringan yoshlarda, ayniqsa sportchilar va harbiylarda kuzatiladi. Tashqi klinik belgilarning yo‘qligi, EKGdagi patologik belgilar aniqlanmaganligi, hamda anatomik jihatdan normal yurak fonida yuz berishi patologik anatomiya uchun katta tashxisiy qiyinchilik tug‘diradi. Ushbu sindrom “negativ autopsiya” holatlari doirasida ko‘riladi. Zamonaviy tibbiyotda ushbu o‘lim holatlarini molekulyar autopsiya orqali aniqlash dolzarb masalaga aylangan.