Qadimgi odamlar iqlim sharoiti qulay, yirik hayvonlar va mevali o‘simliklarga boy bo‘lgan hududlarda yashagan. O‘z avlodlariga ov manzillari va yashash uchun qulay bo‘lgan joylarni maxsus belgilar va chizmalar yordamida ma’lum qilganlar. Uzoq davom etgan tarixiy davrlarda odamlar o‘z ajdodlari an’analarini davom etdirgan va shu tufayli hozirgi kunlarda ham ular qoldirgan boy me’rosni ko‘rish imkoniyatimiz saqlanib qolgan. Maxsus belgilar va chizmalar tufayli qadimgi odamlar eng qulay payt va yaxshi joylarni tanlab olganlar. Shu tariqa daryo vodiylari, ko‘llar va dengiz sohillari, o‘rmonlar, umuman hayvon va o‘simliklarga boy, tabiati xushmanzara joylarda rekreatsion va turistik maskanlar vujudga kelgan.