Milliy tarbiya–bu yosh avlodni muayyan millatning mentaliteti, turmush tarzi va hayotiy tajribasidan o‘tgan g‘oyalarga asosan voyaga yetkazish jarayonidir. Bunda muayyan millatning hayoti davomida amal qilib kelinayotgan milliy qadriyatlar tizimiga asoslaniladi. Milliy tarbiyaning negizini milliy g‘oya tashkil qiladi. O‘zbekiston Respublikasi Milliy ensiklopediyasida ta’kidlanganidek,milliy g‘oya– bu biror millat hayotiga mazmun baxsh etadigan va uni ezgu maqsadlar sari yetaklaydigan fikrlar majmuidir; u millatning o‘tmishi, buguni va istiqbolini o‘zida mujassamlashtiradi, uning tub manfaatlarini va maqsadlarini ifodalaydi. Shu jihatdan o‘zbek millati o‘zining asrlar davomida shakllangan milliy g‘oyasi va unga tayangan milliy tarbiya tajribasiga ega.